SCUPRITI

I siti

NANT’À A MARINA SARTINESA

I siti

Nant’à a marina sartinesa, u Cunsirvatoriu di u litturali hà dicisu dapò a fini di u 70, una pulitica d’acquistera di u fundariu putenti. Par quissa hè statu accumpagnatu da i trè cumuni chì sò Belvidè Campumoru, a Grossa è Sartè chì vuliani pruteghja a so marina d’ una urbanisazioni scatinata chì si vidia nant’à tutti i costi francesi.
U Cunsirvatoriu hà pulsutu cussì fà l’acquistu di un fundariu impurtanti ch’appartinia sia à certi grossi prupiitarii di u lucali, sia à gruppi impurtanti in a finanza o l’assicuranzi. Quissi quì t’aviani in capu unipochi di prughjetti immubiliari tamanti, scumpienti par a marina, com’è in Roccapina induva si parlaia d’un insemi immubiliari di 2000 letti. D’altronda hè in Roccapina, in 1977 , chì u Cunsirvatioriu hà rializatu a so prima intarvinzioni in Corsica.

DI PIÙ

I siti di u sartinesi sò:

U sindicatu Elisa hè gistiunariu di i siti di Campumoru Senetosa, Cala Barbaria è Zivia.

Campumoru Senetosa

À u punenti di Sartè, u situ maiò di Campumoru Senetosa, va da à punta di Campumoru , à u nordu, fin’à a punta di Senetosa, u suddu, nant’à più di vinti chilometri è guasgi 2400 etarri induva s’intricciani patrimonii naturali è umani. A costa pitricosa hè inziccata monda: punti è scoddi si trovani à pari cù cali prufondi è stretti, mittindu à l’ascusu picculi rinaghji.
Da a parti interna si trovani cuddetti cuparti à machja, cù formi tonduli o inziccati. a diversità di i
graniti sfarenti marcani u locu . I più risistanti, i graniti leucucrati sò nant’à i sarri
è i punti à formi putenti. Più tennari, i munzograniti sò stati runzzicati tempu
passendu.
20 000 anni fà, u mari, cù u niveddu più altu, hà frustatu sti cantoni, fenduni piani litturali com’è in Canuseddu è Arana. I vadini numarosi chì falani da i cuddetti ani scavatu ghjargali induva l’acqua, chì corri pocu d’istati, si pò fà grossa toccu u vaghjimu.
In stu locu tamantu, senza strada o urbanisazioni, i vistighi umani sò impurtanti, ancu puru s’iddi sò piattati : caseddi,orii, funtani, torri ghjinuvesi…

Cala Barbaria

À u suddu di Tizzà, a cala di Murtoli hè chjusa à u nordu par u Capu di Zivia è à u suddu par a Punta di Murtoli. In fondu di stu picculu golfu, u longu rinaghju di Tradicetu si finiscia à u suddu par un cala chjuca chjuca induva i scoddi sò guasgi à fior d’acqua è induva s’accutulighja un rinaghju chjucareddu è a so duna, chjamata in francesi « Plage d’Argent ». Hè in sta calaredda, Cala Barbaria, ch’idda si lampa l’Acquedda, vadina di staghjoni chì fala da u pianu di Cauria. À a surghjenti di sta vadina si trovani i vistighi archeologichi famosi di Cauria, a stazzona di Funtanaccia, i Stantari, l’ infilarati di Rinaghju parini essa à u capu di u distinu di u siti da pò milliai d’anni. Vicin’à u mari, i scoddi arrutati facini un locu straziatu cù pintoni chì si falani in mari.
Trà natura salvatica fora di tutta civilisazioni è vistighi umani priistorichi, u situ permetta un viaghju in d’altri tempi.

Capu di Zivia

Trà u golfu di Tizzà à u nordu, urbanizatu, è quiddu di Murtuli à u suddu cù u so rinaghju tamantu è i so tamarici, u Capu di Zivia entri in mari cù i so cuddetti cuparti à una machja zippa da induva affaccani cantoni di grantitu cù formi spissi strani.
A storia giumurfulogica di u situ hè sfarenti di quidda di a marina di Campumoru Senetosa : ùn si trova più quiddi pianuri marini maiori è di punti più arrutati, par via di graniti tennari o risistanti. U locu più pari, finiscia quantunqua in cantunicci spittaculari quand’iddu tocca à u mari : sti ribbi tamanti sò tanti loca d’accolta par pianti è animali particulari.
I pochi paisoli o casi spapersi sò luntani di a punta, chì ferma un locu naturali pocu fraquintatu è prisirvatu, ancu puru s’iddu hè vicinu à unipochi di rinaghji.