U SITU

Cala Barbaria

PRISINTAZIONI

Cala Barbaria

Cala Barbaria era à colpu sicuru u locu d’accessu à u mari par i pupulazioni neulitichi chì ani alzatu i monumenti di u pianu di Cauria. S’infilarati, stazzoni, è stantari sò stati alzati trà 1900 è 1000 nanzi à Ghjesù Cristu. Si parla quì di l’infilarata a più impurtanti di u Maritarraniu.
Ùn si sà anc’ora comu capì la : i stantari t’ani faccia umanu è certi portani una spada o un pugnali. Sò stati truvati dinò unipochi di bancali nant’à u situ. U mubiliari scupartu hè cunsirvatu à u museu di Sartè.
Partendu da Tizzà, una piccula strada in tarra cundunci à un locu da lacà i vitturi à u nordu di u rinaghju di Tradicetu. U chjassu litturali suvita u rinaghju maiori par ghjunghja à «  la plage d’Argent » induva un beddu chjassu vi porta sin’à a Punta di Murtuli andendu longu à a costa trà cantoni magnifichi. Sola a parti nurdinca di a punta hè pubblica ( duminiu di u Cunsirvatoriu), quidda à u suddu hè privata.

Un situ da pruteghja.

Un rinaghju di rena fina, una duna in altu, u cardu marinu simbulu di u Cunsirvatoriu di u Litturali; quandu si parta versu à a punta, à u suddu, un universu di granitu chì u ghjacciu voli supranà. Un chjassu litturali par goda a paci è a dulcezza di i loca ; dui marangoni chì fighjulani passà un scialmu di furoni in st’acqui lindi ; u cantu di u filanciu hè subitu cacciatu da un coppiu di curboni vattendu u so tarritoriu.
Issi spazii sò vivi è fragili, vi ringreziamu di rispittà a rigulamintazioni, d’ùn tuccà à i loca, i fiori, l’animali, è d’ùn disturbà a so paci. Ùn lacheti micca vistighi vosci supralocu. U camping, u bivaccu,, i foca, u rumenzulu a circulazioni di i vitturi è altri mezi di trasportu muturizzati sò intardetti.

A duna

A duna chì si trova daretu à u rinaghju hè chjamata duna impalaficata parchì codda abbastanza in altu nant ‘à a cuddetta. Hè u tistimoniu di un sistema dunali più impurtanti chì s’era furmatu nant ‘à i nosci costi dopu à l’epica ghjaciaria. C’era di più rena purtata, par via di una ruditura più massiva di i cimi è par via di i venti litturali più forti.
U niveddu bassu di u mari era dinò un elementi favurevuli à a furmazioni di sti duni.
A duna di a Cala Barbaria hè cuparta à ghjacci ( juniperus oxycedrus macrocarpa).
Mondi appriziati da quiddi chì praticaiani u camping dittu « salvaticu »à sapè forastrutturi, stu buschettu è a duna erani arruvinati da veru. U situ acquistatu, u Cunsirvatoriu hà intardettu u camping, i stallazioni sò stati smuntati è a duna hè stata prutetta da una sarrenda spicifica in legnu castagninu.

I pianti

« La plage d’Argent » sarà podassi stata chjamata cussì par via di u muchju marinu o à u cardu marinu chì si trovani nant’à a rena à u nordu di u rinaghju: a so fronda grisgia è argintina dà un culori guasgi biancu à i pianti chì coprani a rena chjariccia. À a foci di a vadina un spaziu umidu hè circundatu di tamarici chì di branu s’inguttupighjani di fiori russicci.
I rocchi di u litturali t’ani pianti spicifichi, adattati à cundizioni pessimi è ci si trova u piumbonu marinu.

Animali

In i chjappuli di a punta di Murtuli, induva l’acqua ci sbucca à surghja, a variulata è u ruspu si poni ripruducia. A campagnola, grisgiuletta cù l’ochji allistatu di russu si ni stà anch’idda sopralocu. I cicciari , i marangoni, i cruchji si facini vardiani di a costa.