Rimissa inni statu di u picculu patrimoniu custruitu.
Metta in valori i custruzzioni anziani.
U situ di Campumoru Senetosa hè riccu di stu patrimoniu, tistimoniu di una attività agrupasturali impurtanti in u passatu nant’à stu tarritoriu tamantu. I travaddi di rimissa inni statu fatti da u sindicatu, sò distinati à metta in valori sti custruzzioni anziani par quiddi chì venini à spassighjà nant’à sti chjassi, ma ancu à dà un antra vita à certi elementi senza ch’iddi fussini visitati da u publicu. L’aghjenti di Elisa ani avà una maistria in a rialisazioni di i travaddi di rimissa inni statu. Un annu apressu à l’annu circani à metta in valori funtani, caddi o passaghji, aghji, carbunaghjoli, furri, ribbi, chjosi, cù tecnichi antichi di muratura à l’asseccu. Eccu quì dui asempii d’intarvinzioni.
Rimissa inni statu di un passaghju di muru.
I chjassi pruposti à u pubblicu nant’à i siti di u sartinesi suvitani certi volti vechji chjassi tralasciati dopu a fini di l’agricultura tradiziunali. Truvati da l’aghjenti à a criazioni di u sindicatu, certi ùn sirviani più da poi più di 50 anni. Sti chjassi francaiani i muri in petra chì spiccaiani i prupiità tutti posi. Oghji sti muri sò guasgi tutti ammachjati, sta machja chì in calchi dicini d’anni hè crisciuta in locu è piazza di l’orzu è u granu.
U muru smachjatu, i parti sfraiati sò sfatti. I petri sò scelti è accantati. Hè impurtanti di truvà i barretti ( longhi è piani) è di mettali da cantu. L’arburi chjuchi o maiori chì sò crisciuti drintu o longu u muru, sò dicippati. Hè spissu nicissariu di scavà dinò.
I petri maiò sò piazzati i primi, sò iddi chì ani da stabiliscia u muru in a so parti bassa.
Si partarà sempri da l’angulu di i punteddi sciddindu i più beddi petri par l’angulu chì sarani incrucciati quandu si farà a muratura. Sò muri doppii, s’alza i dui lati à tempu lachendu una piccula pendita drintu. A basa di u muru pò misurà 80cm di larghezza è finiscia à 50cm sottu à i barretti.
Alzendu u muru si riempia u drintu cù picculi petri chì servani d’arrestu, sticchisciani a struttura. Sti pitriceddi venini par u più da petri lacati da cantu par a custruzzioni è chì sò stati scuncassati.
I barretti sò tandu piazzati. Sò scelti par via di a so lunghezza chì devini sorta à pena d’ogni latu di u muru. Venini à mettasi nant ‘à u paramentu è cussì stabilisciani a parti alta di u muru. Hè ciò chì faci strazià u più in a custruzzioni di u muru.
U passaghju di muru ritrova tandu u so aspettu di prima è hè missu in valori.
Nanzi
Dopu
Rimissa inni statu d’un vechju furru…
In Corsica, ogni caseddu , ogni paisolu, ogni carrughju t’avia u so furru. Erani com’è i funtani o l’aghji, i « picculi monumenti » di a vita d’ognighjornu, erani u simbulu di a vita, di a spartera, di una cumunità è di a prisensa d’una mansa d’aghjenti chì staghjiani in sti campagna in particulari à a fini di u XIX ᵘ seculu.
U pani si facia in famidda. Frateddi è cucini s’addiminani par carrià a ligna è scaldà a volta fatta à chjapeddi o à petri. U pani si coccia u sabatu. A tacca devi bastà par a sittimana è par tutti quiddi chì stani in a casa.
I vardi d’Elisa ani rifattu u furru d’Alturaghju, ancu puru s’iddu era luntanu di i chjassi da spassighjà, ghjustu par rinviviscia un elementi di u nosciu patrimoniu cumunu.
Eccu quì i ritratti di tutti i tempi di a rimissa inni statu di u furru.
PAR SAPÈ NI DI PIÙ
Da leghja dinò
Apartura è accunciamenti di i chjassi.
Hè impurtanti di prupona à i visitori, chjassi in cundizioni, pratichevuli da tutti.
A stallazioni di a signaletica
Hè d’impurtanza nant’à un situ, dà infurmazioni, guida è ancu rassicurighja.